Lifandi sjávardýr
Í Fiskasafninu eru 12 sjóker með fjölda lifandi fiska og annarra sjávarlífvera. Í kerjunum er 7°C heitur sjór sem dælt er úr 30m djúpri borholu skammt frá safninu. í safninu er jafnan að finna marga af helstu nytjafiskum, sem veiðast við Ísland auk krabba, sæfífla, krossfiska, ígulkerja, kolkrabba og skeldýra.
Spennandi fyrir krakkana
Í Fiskasafninu er snertibúr með kröbbum, krossfiskum, ígulkerjum og sprettfiskum sem gaman er að skoða og handfjatla.
Fuglasafn
Í fuglasafninu eru flestir íslenskra varpfugla uppsettir ásamt fjölda flækingsfugla auk uppstoppaðra krabba og fiska. Í fuglasalnum eru einnig egg nær allra íslenskra varpfugla svo og skordýrasafn.
Steinasafn
Í steinasalnum er eitt merkasta skrautsteinasafn landsins. Safnið er gjöf hjónanna Unnar Pálsdóttur og Sveins Guðmundssonar. Þar er að finna flestar þær steinategundir sem finnast á Íslandi.
Pysjueftirlit
Á haustin fara börn í Vestmannaeyjum á kreik og bjarga pysjum sem hafa flogið að ljósunum í bænum. Þau koma með pysjurnar í safnið þar sem þær eru vigtaðar og mældar. Þennan tíma er rekið pysjuhótel á safninu fyrir litlar og dúnaðar pysjur.